Bitcoin價格屢創新高，雖然當中涉及一定嘅投機成分，但確係人氣十足，就連中國電信（00728）亦破天荒借此搞搞新意思，中電信嘅江蘇分公司，近日就首次接受客戶以Bitcoin作為預購手機嘅訂金。雖然好多人都話中電信此舉係噱頭，不過仍然吸引內地網民嘅熱烈討論。
中電信江蘇分公司接受Bitcoin預購嘅，係佢哋向三星訂制，叫價高達二萬人民幣嘅W2014超豪智能手機。至於預購安排，是中電信接受客戶以0.1個Bitcoin作為預購訂金。
因應Bitcoin嘅價格上落，中電信亦好均真，表明Bitcoin實際兌換率會按bitbill.com嘅實際報價作調整，並提供一項「保底」承諾，話明0.1個Bitcoin最少可抵扣500元人民幣通話費。
但由於部手機要賣成二萬元人民幣，中電信即使唔把收取0.1個Bitcoin「兌換」成現金，最多都只係幫部手機打個折頭，所以根本講唔上要承受Bitcoin波動嘅風險。
比對內地有地產商聲稱接受以Bitcoin買樓，中電信呢招涉及嘅金額極細，但中電信作為央企這個推廣仍然引發網民嘅討論，短短一個下午，微博就被轉發超過1,200次，有人覺得震驚，有人認為「中電信好酷」，一句講晒，大收宣傳之效！
余絲韻