不少有錢人往往將發迹地保留，但「股神」巴菲特投資旗艦巴郡位於麻省新貝德福德嘅前總部就無咁好命，業主勒唐德爾準備將佢夷為平地，起停車場。
呢棟有86年歷史嘅建築物破舊不堪，自○八年起一直丟空。當地市長米切爾知道佢即將被拆，覺得非常可惜，心急如焚，仲親自為佢搵新租客，努力喚起保育人士關注。
不過巴菲特本人就一啲都唔留戀呢棟被指係佢發迹地嘅建築，勒唐德爾前排問佢有冇興趣保育，佢都有禮貌地一口拒絕。到底係咩事令「股神」咁決絕呢？莫非係佢出名唔受感情影響嘅投資心理？
統統唔係！話說巴郡舊總部，原本係巴菲特喺六五年收購、叫「巴郡」嘅紡織廠總部。之前間廠削減成本，用現金回購股份，好啱「股神」心水，於是不斷吸納，等高價沽番出去。後來東主同巴菲特傾好用每股11.5美元回購，但最終出價得11.375美元，巴菲特嬲起上嚟，一口氣掃入多數股權，將東主踢走，自己做巴郡主席。
後來美國紡織業不敵海外競爭而式微，巴菲特喺八五年執咗間廠，最近仲話收購巴郡係成世人最蠢嘅投資，「如果當初買嘅係一間優秀保險公司，巴郡市值會係今日兩倍」。換言之「股神」望見座建築就「眼冤」。
講就咁講，巴菲特憑依間廠發達係鐵一般事實，因為佢收購巴郡紡織廠後初期嘅現金流，對擴張十分重要。或者因為咁，股神始終保留巴郡個名。
余絲韻