唔知係咪公司業務好轉，令管理層心情都好啲，所以今年嘅禮物包特別大手筆，入面有朱古力、曲奇餅同埋頸巾，仲有張公司優惠券添，等班股東過一個又甜又暖笠笠嘅聖誕節！
忠實粉絲開心有嘢食
一年一度嘅思捷股東會，一如以往咁，吸引一大班公公婆婆級忠實粉絲前去撐場，例牌問吓公司業務情況咁，所以思捷都好識做，年年都準備咗個禮物包畀大家，例如舊年就係毛巾。今年有啲股東仲同絲絲講，幾鍾意個禮物包，因為有嘢食。
最近思捷上演「鹹魚翻生」嘅劇目，不過距離股價歷史高位仍然差天共地，相信唔少股東仲坐緊艇，佢哋最想見到嘅應該係股價再上番去，所以睇怕思捷班管理層要再努力啲喇！
余絲韻