英國首相卡梅倫親率商務代表團訪華，促進中英嘅商務合作，電子商務巨頭阿里巴巴集團，原來都係佢哋會面對象之一。
卡梅倫尋日就同阿里主席馬雲進行20分鐘私人會面，阿里仲同英國貿易投資推廣署簽定合作備忘錄，協助英企以淘寶嘅天貓B2C購物平台，開拓內地嘅消費市場。
卡梅倫與馬雲會面，再次證明馬雲呢位「網絡狂人」嘅國際影響力。據阿里指，卡梅倫同馬雲主要討論點將兩地產品，有效咁去到對方嘅market。
講到電商同互聯網行業發展，內地目前已「超英趕美」成為世上增長最快嘅市場，內地科網企業嘅品牌價值亦因而急升。
國際廣告巨企WPP旗下嘅研究公司Millward Brown嘅報告指出，騰訊（00700）目前嘅品牌價值已達339億美元，雖然仍低於首位嘅中移（00941）及工行（01398），但已經直追美國零售巨企沃爾瑪今年五月嘅360億美元品牌價值，但由於份報告只以上市公司作為分析對象，所以仍未上市嘅阿里並不納入今次嘅評估範圍。
余絲韻