絲絲講場：內企橫掃傑出董事獎
內地企業佔本地金融市場份額愈來愈大，就係人都知喇，估唔到連香港董事學會嘅傑出董事獎選舉，都由內地機構囊括主要獎項，包括恒指成分股及非恒指成分股嘅五個獎項。
講到呢個問題，香港董事學會主席黃天祐話，其實都反映咗香港實際情況，同埋喺呢幾年內地企業比以前注重咗管治，希望透過獨立機構對公司管治進行評審，帶到啲新改變畀公司。
參賽過三關 評審嚴格
黃天祐話「呢個獎唔喺畀錢就可以買到，喺評審過程中對企業嚟講係一個大鼓舞」，佢仲話依家內地機構都渴望可以提升管治，同埋特別留意公司做得好定唔好。
絲絲聽埋評審過程，真係打咗個冷震。獎項係經過嚴格嘅甄選過程，參賽嘅公司需要就七個管治環節提交資料，同埋進行歷時個多小時嘅面試，之後仲會經過28位評委嘅評審。
黃天祐堅拒雙重股權
講開公司管治，阿里巴巴都係一個幾好嘅研究對象，黃天祐再度批評阿里擬以雙重股權形式嚟香港上市。
佢強調，雙重股權制度絕不可取亦不能接受，公司上市嘅目的並非主要為集資，而係令公司經營更穩健，同時可與小股東榮辱共享，又話阿里巴巴當年股價以高位上市，然後喺低位私有化嘅事件前車可鑑。
余絲韻