絲絲講場：恒生水哥發力向上跑

人稱「水哥」嘅恒生銀行（00011）傳訊及企業可持續發展總監張樹槐（Walter），好多人都知佢係長跑好手，至今完成逾四十個馬拉松賽事，近年佢向「高度」挑戰，參加跑樓梯比賽。

早喺○六年，水哥已參加國際金融中心（IFC）嘅跑樓梯比賽，佢話當年第一次跑，無經驗又唔熟環境，所以留力跑，跑完都唔覺辛苦！

舊年水哥轉戰全港最高建築物環球貿易廣場（ICC），用咗大約二十分鐘就征服2,120級樓梯，仲話留咗力添！今年佢再接再厲，希望打破舊年成績，最近積極備戰，例如去健身房踩吓單車咁。

比起馬拉松，水哥話跑樓梯對爆炸力嘅要求更高，但過程就無馬拉松咁辛苦。佢話親身跑上一百層高樓，從高空俯瞰香港嘅美麗景色，已經令佢好開心。

ICC係垂直馬拉松世界巡迴賽（Vertical World Circuit，VWC）嘅終點站，據講多位國際級跑樓梯選手，將會來港參與「精英賽」，爭奪世界冠軍嘅最高殊榮。新鴻基地產（00016）兩位主席郭炳江同埋郭炳聯會一齊見證終極冠軍嘅誕生。