絲絲講場：會公企管獎寧缺毋濫
由香港會計師公會（CPA）主辦嘅「最佳企業管治資料披露大獎」，唔經唔覺已經舉行到第十四屆。活動設有五個組別，但喺CPA堅持寧缺毋濫嘅原則之下，最終有三個組別嘅最高榮譽獎項懸空。
中電保誠奪「鑽石獎」
每個組別嘅最高榮譽獎項係「鑽石獎」，今年只得「恒指成分股組別」同埋「非恒指成分股（大市值）組別」名花有主，得主分別係中電控股（00002）同英國保誠（02378），而中電更加係連續十一年雄霸鑽石獎。
CPA會長趙麗娟（Susanna）話，其實整體嚟講，今年嘅企業管治水平已經有所提升，但係CPA嘅衡量準則，係企業必須超越最低要求，符合資格先至獲頒獎項，而唔係「分餅仔」。
讚民行獨董實地返工
喺「H股公司與其他中國內地企業組別」，聯想集團（00992）同民行（01988）今年都係首次得獎。大獎籌委會主席羅柏達（Patrick）特別指出，民行有一項安排極富創意，就係安排獨立非執行董事每個月抽一、兩日到銀行工作，藉此加深佢哋對銀行業務嘅了解。
余絲韻