每逢年尾都係總結年度表現、頒發成績表嘅日子，財金界亦都唔例外，彭博社旗下嘅雜誌Bloomberg Markets，就公布咗年度預測最準確評選結果。
整體嚟講，摩根大通嘅經濟學家準確度最高，而中國區就以高盛經濟學家宋宇以65.21分跑出，佢仲畀彭博選為年度預測No.1經濟學家添！
絲絲睇過今年嘅評審指標，包括佢哋對GDP、CPI、耐用品訂單、消費者信心、PMI等多個指標嘅預測，而除咗大行評選之外，彭博亦從美國、歐元區、中國、日本等多個經濟體選出獨具慧眼嘅經濟學家。
大行當中，摩根大通嘅經濟學家於至少四個預測地區榮登前三甲，唔通佢哋真係有「水晶球」在手？
而高盛嘅資深經濟學家宋宇，曾經喺美國聯儲局同巴黎經濟合作及發展組織任職，年僅35歲嘅佢今年曾預測中國GDP增長下調0.2個百分點至7.6%。
至於一四年佢就預料，隨住中央加大環保同醫療保健嘅開支，以及出口逐步回暖，中國GDP可回升至7.7%，對經濟前景感樂觀。
余絲韻