中東地區長期立立亂，恐怖襲擊事件好平常，但渣打集團（02888）竟然冇有怕，喺伊拉克嘅巴格達開分行，咁重要嘅部署，唔怪得連總理都出席分行開幕禮啦。
據講渣打係第一間喺伊拉克設立分行嘅英國銀行，呢個部署唔知係咪要遵從番業務以新興市場為主嘅宗旨呢？
查實渣打喺○六年起，已經喺伊拉克設立代表辦事處，不過服務當然無分行咁全面喇。除咗巴格達，渣打遲啲仲會喺伊拉克另外兩個城市開多兩間分行。
伊拉克近年局勢比較混亂，今次有跨國銀行進入市場，透過分行提供全面銀行服務，市場認為係一個里程碑。雖然只係分行開幕，但據英國傳媒報道，伊拉克當局非常重視，連總理都出席開幕儀式，認真畀面。
喺伊拉克有乜嘢銀行服務？據講，除咗為當地嘅油公司、電訊公司提供服務之外，渣打仲會擔任特別顧問角色，為伊拉克政府、大臣同埋伊拉克中央銀行提供協助添。渣打就話，希望佢哋嘅出現，可以為當地經濟同聲譽帶嚟改變。
余絲韻