Market Insight：水泥股上升空間大

今個禮拜網購迷真係唔好錯過，不妨去美國網站執平貨，就算唔鍾意隔山買牛，部分有出口生意的內地家電公司，好似海爾電器（01169）都可以留意吓。

人行行長周小川前日話中國未來要進一步擴大合格境內機構投資者（QDII）及合格境外機構投資者（QFII）主體資格及投資額度，條件成熟的話會取消QDII及QFII額度審批。內地資本要加快國際化進程，若再視外資為洪水猛獸，設下諸多限制實已不合時宜，但中國資本市場開放，人民幣自由浮動，三兩年就翻炒一次，新人事新作風，中國領導層換屆之後今趟會否十畫多幾撇？因無水晶球，大家都係估估吓，不過近期中港股市氣氛，多少見到大孖沙都對呢個願景幾受落。

古勝冇點你2013/11/28

萬里長空

港股年尾破關可期

滬綜指昨日重上2,200點樓上，港匯維持強勢昨日高見7.7518，加埋港版恐慌指數VHSI回落至15.83，見十一月下旬的收市新低，看來港股要突破24,000點阻力，僅是時間問題。

昨日恒指升125點收報23,806點，今日期指結算日，十二月期指日市收報23,865點高水59點，期指大戶蝕住四、五十點轉倉都在所不計。踏入十二月，儘管乃傳統外籍芬佬埋數放假，共享天倫的好日子，但睇大環境，下月初炒多浸派埋聖誕禮物至食大餐都唔出奇。

真係好嘅唔靈，資金繼續由三中全會受惠股流向其他落後股，乳業股浴血，僅得估值夠平的半新股原生態牧業（01431）企得住，短期要睇上唔上得番2.7元上市價樓上至有計。此外，秦皇島動力煤價連漲五星期，去到每噸554元人民幣的一年高位，截至本月二十五日，秦島煤炭庫存少至475萬噸，一星期減少70萬噸，亦係兩年來最低水平，消息刺激兗煤（01171）、中煤能源（01898）升1.3%及1.7%至8.47元及5.11元，大落後煤炭股在外部消息配合下，睇嚟未玩完。

中燃買貨要畀耐性

中國燃氣（00384）公布半年業績，營業額及純利分別大升46.4%及58.7%，至104.6億元及12.83億元，毛利率見改善，每股盈利27.41仙，中期成績表已達到街外平均預測全年賺21億元的61%。美銀美林調高今明兩年每股盈利預測15%及11%，去到51仙及60仙。昨日股價炒高7%收報9.94元，相當於一四年三月年度19.4倍市盈率，以明年17%增長，燃氣股中唔算貴，但10元又似乎將短期利好因素反映得七七八八，睇嚟可以等吓。

台灣上市的母公司台泥（TCC），宣布以每股3.9元私有化台泥國際（01136）。而早兩個月古勝已講過，華南一帶水泥價格拾級向好，加上安徽海螺水泥（00914）及中國建材（03323）等龍頭的策略聯盟協議，無割喉減價競爭，水泥股價值有被低估之嫌。估唔到仲一鋪過，索性以一三年10倍市盈率收歸台泥為已用。

中建材基本面改善

查實其母公司一三年預期市盈率近17倍，咁平買番個仔，難怪消息在台灣方面好受落。昨日阿媽股價仲創埋一年新高。本來在下對中短線水泥價格睇好，惟今次交易立竿見影，台泥對前景有幾睇好，唔使畫公仔畫出腸，展望華南更多大型基建啟動，廣東一帶新增產能又相對較少，趁目前估值仲唔高（起碼畀咗10倍PE標準你睇），其實仲有好多行家可以揀。

好似龍頭股之一的中建材，大行預算今年底明年初，資本需求會度過高峰期，水泥價格睇升加上現金流改善，業績唔難可持續改善，依家股價8.74元，計落一三年PE唔夠7倍，昨日只升得3.2%，其實真係升得少，照睇去番年初股價約11.34元，都講緊有近三成升幅，博得過也。

古勝