絲絲講場：雷賢達剃髮撐毅行學生

有「基金教父」之稱嘅雷賢達（David）名副其實退而不休，除咗關心本港嘅房屋問題同強積金長遠發展之外，仲好鬼緊張教育問題o架！究竟有幾緊張？David竟然肯剃髮支持，睇得出佢好認真啊！

David同絲絲講：「其實香港嘅貧富懸殊好嚴重，父母要出外工作，自然疏於照顧小朋友，我發現好多青少年唔願讀書，誤入歧途，甚至去食毒品，家庭背景唔係新移民，就係單親家庭，所以我得閒就會去中學做探訪，同啲中學生傾吓偈，鼓勵佢哋發憤圖強，千萬唔好放棄自己，因為只有讀好書，跨代貧窮先有希望獲得解決。」

好似早前「毅行者」活動開鑼，David經常探訪嘅大嶼山大澳佛教筏可紀念中學亦有三隊同學仔出征，而佢哋出征之前，全校近四百名師生仲喺學校操場搞咗個「齊剃髮，發善願」大會，一於以剃頭行動表示決心。

而當日David仲帶埋太太出席，甚至自動自覺參加埋剃髮行動，可見佢出心又出埋頭髮咁支持班學生哥，呢個「教父」認真掂呀！

余絲韻