本港老牌地產商南豐集團挖咗黑石集團（Blackstone）大中華區主席梁錦松，明年二月過檔做南豐行政總裁，絲絲一啲都唔奇怪，最重要係睇松哥可以帶領南豐去到幾盡？
絲絲嘅賓卡老友不約而同話，松哥首項大任，相信就係重整南豐資產同上市。
南豐主席陳慧慧話，梁錦松帶領嘅業務將涉及房產、開發、建築、資產管理等。
而絲絲就留意到，松哥會繼續擔任黑石高級顧問及國際顧問委員會成員，即係呢間全球最大私募基金之一嘅黑石，可以話同南豐保持緊密關係，第日無論投資發展同上市搵基礎投資者都咁方便。
老友同絲絲分析，松哥○七年加入黑石就引入中投入股30億美元，顯示佢內地人脈深厚，近年主要協助黑石喺內地收購房地產資產。
例如早前傳黑石以4億美元，入股內地商場營運商深國投商置四成股權，就有傳係松哥包辦。南豐挖佢絕對有理由。
至於松哥履歷，相信大家都記得佢做過香港財政司司長、摩根大通亞太區主席，而老婆就係跳水明星伏明霞。