聯儲局主席伯南克今回真係自作孽嘞！佢力撐虛擬貨幣，比特幣（Bitcoin/BTC）個價好似食咗興奮劑咁，去到900美元（約7,000港元）新高，可能會誘使更多人玩埋一份。
美國「暗殺市場」（Assassination Market）網站，就將買兇殺人嘅價錢，以比特幣換算，偏偏伯南克嘅「身價」最高，買兇殺佢要124個比特幣。
絲絲上過呢個搞鬼嘅「暗殺市場」網站睇過，榜上只有6個人，個個都係大人物，包括伯南克、美國總統奧巴馬、芬蘭總理卡泰寧（Jyrki Tapani Katainen）、法國總統奧朗德（Francois Holland）同美國國防部國家安全局局長亞歷山大（Keith Alexander）。
六個人中以伯南克嘅「身價」最高，出價達到124個比特幣。以比特幣最高價格900美元計算，伯南克的「身價」超過11萬美元（約86.6萬港元）！排第二位係奧巴馬，不過佢嘅「身價」只不過40個比特幣，低過「阿伯」好多。
呢個排行榜明顯係衝住伯南克而來，因為比特幣出現嘅原因之一就係為咗抗議政府「印銀紙」搞到通貨膨脹，而聯儲局話事人伯南克自然首當其衝啦！