Market Insight：券商股高沽低揸

於上周五晚，CCTV證實改革內容同之前所傳大同小異之後，期指客再下一城，夜期再挾278點，收23,281點，以期指計V形反彈升近900點，最慘仲係周三畀大戶痛屠的牛證友，眼見大市無事發生一樣，但已經無仇可報。

之前賓架睇完三中全會份大約五千字的初稿，個個仲埋怨新領導雷聲大雨點小，周五傍晚詳細內容一出，唔少人都大感意外，尤其改革細節上，似乎大家都畀之前份五千字文件「呃」咗。最近睇過一份大行調查，指近日亞洲新興市場的基金，大都因為憂慮美國退市，現金比重處偏高水平（普遍在4.5%以上），以港股及中資股偏低估值，似乎後市的確有條件突破23,500點的重要阻力。

古勝冇點你2013/11/18

萬里長空

單邊市有機會出現

事實上，睇恒指波幅指數，自六月見過30高位之後，持續回落，十月更見過近九個月低位，近日也在15的低水平徘徊，衍生工具的引伸波幅偏低，不能夠排除一次較大幅度的單邊市，會趁三中全會改革明朗化，而港股又已經持續一段時間落後於外圍股市的情況下發生。

中央的深化改革詳細內容，涉及好多個領域，經濟、司法及醫療等範疇都有，炒家最關心仲係實施三十四年的一孩政策，終於落實放寬，一方獨生子女夫婦一如預期，未來可生育兩個孩子。臨近蛇尾，即使心急父母未必趕及生馬仔，但後年好可能是中國人口增長一個重要轉捩點，會有很多因受惠政策放寬的羊B出世。

分析估計，中國每年新生人口，會因此由今年的1,300萬升至五年後的1,600萬，做嬰兒及小朋友生意的，市場個餅無形中大了23%，可以估計炒咗一排的乳業股，尤其嬰兒奶粉股合生元（01112）及雅士利（01230），氣氛將到達高峰。

蒙牛眼光異常獨到

講開又講，被中糧集團收歸國有後的蒙牛乳業（02319），先是押注養牛的上游生意現代牧業（01117），隨即遇上原乳價格上升周期，今年再買埋雅士利進軍嬰兒奶粉，隨即有國家銀彈扶持內地幾間龍頭企業，同時以反壟斷壓制來路品牌，雖然揸過界，但搵到淡馬錫及厚撲義助接貨，上周初在一孩政策放寬前復牌，每一步部署的時機及政策掌握都準到離譜，真係要寫個「服」字。

估計今日早市，本來已經強勢的新能源、環保、醫藥、科網股及電訊設備股，好大機會進一步雞犬皆升。上星期華潤創業（00291）第三季業績，純利倒退19%至9.2億元，扣除資產重估等一次性影響，實際核心溢利升逾三成，當中，雪花啤酒銷情比預期強勁，為啤酒業務第三季提供7.5億元貢獻，佔整體盈利近八成。

華創撈貨不妨等等

如果睇見青島啤酒（00168）近39倍PE，就將華創當作啤酒股咁衝入去，就要小心。華創業績後睇見大行都係口淡淡居多，主要係短期金威及Tesco的合作帶來的前期損失，明年可能抵銷啤酒業務的強勁增長，估值唔平，短期又無「景」，八月由22元樓下炒上嚟，似乎27元頂頂哋，捧場客似乎可以等等，或者等明年中期份業績，上面兩個短期負面因素全部浮現出嚟至諗佢。

上周五，受新三板試點方案將發布的傳聞刺激，內地券商股做好，成A股升市領頭羊，而在港，中信証券（06030）及海通證券（06837）亦同上升逾6%，分別收報16.58元及11.7元，中國銀河（06881）亦升4.6%。海通證券股價自九月高位12.84元反覆回落，上周五以一支大陽燭兼有大成交配合，一口氣重上250日線，可謂一洗頹風。

但內地股市要重拾升軌，必須要安渡重啟IPO呢一關，此前券商股料有波幅冇升幅。以海通為例，暫時策略仍維持在10至12元水平高沽低揸。

古勝