阿里巴巴向港交所提出嘅合夥人制度搞到滿城風雨，但內地電子商務營運商慧聰網（08292）首席執行官郭江就相當支持呢個制度，仲要「舉雙手贊同」。
佢解釋話阿里巴巴第二大股東雅虎係唔善意嘅股東，所以阿里必須堅持走合夥人制度。雖然郭江揚言「如果阿里做到，我也受益」，但佢透露計劃出年三至四月再申請，將慧聰網由創業板轉去主板上市，但就無意效法阿里嘅合夥人制。
慧聰網現時嘅業務主要係透過提供商業訊息協助配對交易，渠道包括行業入門網站、黃頁指南及搜尋器服務，前排更加喺阿里積極挖角，包括現任副總裁楊寧。
郭江坦言互聯網公司靠嘅唔係錢，而係人才，而且想喺互聯網業做出一番事業，只得35至40歲係黃金年齡，「互聯網這行業，神人也做不了，馬雲也退休了」。
至於慧聰網未來發展大計，郭江就話有意開發互聯網金融業務，正申請全國性小額貸款公司牌照，規模約10億元人幣，以「封閉平台」嘅模式，向客戶提供借貸。
佢仲話甚至唔介意以零利息率試行，因為佢覺得「互聯網是先賠錢，後賺錢也可以」，佢預期項目出年第二季就可以正式開始運作，未來兩年可以將貸款利率降到去10%以下。