最近內地互聯網金融發展真係勢不可擋，除咗愈嚟愈多公司加入競爭，作為先鋒嘅阿里巴巴集團更加已經進入「豐收期」。
絲絲收到最新消息，阿里巴巴同天弘基金合作嘅「餘額寶」，投資規模已經突破1,000億元人民幣，更成為內地第一個突破呢個關口嘅基金。
除咗打破內地基金嘅投資規模紀錄，「餘額寶」亦喺全球貨幣基金榜上有名，目前嘅規模排第51位。雖然「餘額寶」只係推出咗五個月，但用戶人數已增至3,000萬名，仲有唔少投資者主動將資金投資落「餘額寶」添。
有姊妹曾經同絲絲講過，擔心投資「餘額寶」之後，會好難拎返啲資金出嚟。其實啱啱過去嘅內地「雙11」光棍節當日，「餘額寶」用戶已經喺基金內提取61億元人民幣，相當整個基金規模嘅11%左右，基金嘅運作依然暢順。難怪唔少業內人士都預計，類似嘅基金會愈做愈有啦！