絲絲講場：任大炮「花圈」幫潘石屹祝壽
生日收到大大個花圈贈興，你會有咩感覺？呢個問題問SOHO中國（00410）老闆潘石屹就最啱啦，事關佢尋日過50歲生日，一朝早返到公司，就收到個勁大個花圈，上面仲有埋「50」兩個字，搞到公司班手足同客戶都嚇嚫。到底邊個咁大整蠱，之咪係有「任大炮」之稱嘅華遠地產老總任志強囉。不過，兩個人老友鬼鬼廿幾年，潘總唔單止冇嬲到，仲第一時間同個花圈影返張合照發上微博，同大家分享生日喜悅添呀！
「送紮花」變特大版
潘總解釋話，幾日前任志強曾經打過電話畀佢，問送佢咩生日禮物好，佢話最好咩都唔好送。任總覺得咁樣唔得，最少都應該送返個生日蛋糕，咁佢就答話，自己係唔食蛋糕嘅，不如就送紮花啦。
點知，尋日朝早，「土豪」任總嘅花送咗來，唔係一紮咁小兒科，而係個紅色心形大花圈，嚇到公司啲同事同來訪嘅客戶都問，到底出咗咩事？
其實早喺今個月頭，任志強已經喺微博話自己正煩緊要送咩禮物畀潘總，仲感慨認識「小潘」嗰時，佢都仲未到三十，真係「歲月如梭過」。淨係呢份誠意，已令好多網友感動，尋日潘總同花圈嘅合照一擺上微博，即刻有網友讚任總「夠格調」，仲估個花圈應該係友情「至死方休」嘅意思喎。