德國政府經濟顧問小組其中一員嘅靚女智囊Beatrice Weder di Mauro突然公開話人稱「末日博士」嘅著名經濟學家魯比尼欠佢一筆債，一向具危機意識嘅魯比尼經常叫人小心風險，竟然都會欠落女人一身債？
雖然追債嘅係靚女一名，但嗰筆債就唔係「情債」，而係「賭債」，原來靚女Mauro喺一二年歐債危機爆發時，同魯比尼打賭過希臘會唔會退出歐元區，結果當然係Mauro贏出，佢仲話同魯比尼時不時見面，每次都會向佢追債，魯比尼保證下次見面一定會還債。佢哋講緊嘅賭債其實係咩？ 原來只係一支香檳。絲絲心諗，一支香檳唔使幾多錢啫，實情係魯比尼輸支香檳事小，輸牙骹事大，仲要輸畀一位女士添！
之不過，希臘政府可能要多謝魯比尼囉，因為佢預言希臘會退出歐元區，好彩佢預測錯誤咋！所以話，呢支香檳直頭係希臘嘅救星！
魯比尼其實又唔使覺得輸畀女人好冇面嘅，事關現年48歲嘅Mauro來頭其實不小，佢係德國政府經濟顧問小組首個女性成員，為政府出謀獻策。目前佢加入咗一個由歐盟資助嘅經濟小組，研究發行債券贖回基金同具多重發行人嘅短期票據，幫助穩定歐洲經濟。
余絲韻