Market Insight：水泥股隨時落鑊

周三無端端大插437點，借退市預期降溫，昨日港股升185點報22,649點，但反彈市主板成交卻由周三621億元縮返落542億元。在此要同看官耍個冧，皆因前日騰訊（00700）季績唔好，以為個市隊穿四舊等業績，今次佢實死無生，意外是隔晚美國上市內地網股反彈，去哪兒（QUNAR）升6.99%，ChinaCache上升6.6%，新浪網（SINA）更升11.9%，昨日騰訊股價不單止無跌，仲要重返四舊樓上，升4.6%報收410.8元。

昨日已提過季績條大數（純利）麻麻，差不多係估計下限，但經過分析員會議同管理層會面後，一班賓架們頗滿意佢網遊毛利率keep到，以及手遊生意發展比預期快，佔總收入去到1%！講到尾，同近期美股一樣，當大眾睇好的時候，總係想辦法搵到值得憧憬之處，話PE高咩？即刻會有人笑你，網股仲邊有人睇PEo架。

古勝冇點你2013/11/15

萬里長空

環保政策大路之選

三中全會塵埃落定，心水清的可能發現古勝一直無提過可以吼吓邊類國策股，望住五千多字公報，金融改革輔以環保、文化及TMT等新興行業，範圍之大，兼且沒短期政策指引，估估吓之下，在下相信最先仲係銀行業改革，利率市場化及人民幣國際化已經講咁耐，都係時候郁手。觀乎近兩星期內銀股有春江水暖鴨先知情況，跌多彈少，顯見推斷合理。

反而，環保是比較大路兼易捉，睇住入冬後中南海霧霾指標日日徘徊二百幾三百，實在唔到領導人唔急。可再生能源股中，太陽能股已經炒咗一排，最近國家能源局的文件披露一四年中國光伏發電規模的安排方案，預料明年新裝機組12GW，比今年的6.5GW幾乎翻一番，保利協鑫（03800）昨已經作勢挑戰52周高位2.65元，但古勝同佢八字唔夾，都係得個睇字。

海螺正靜待爆發點

在下反而留意到隻興業太陽能（00750），前日以每股8.1元批4,000萬股畀六個投資者，之後試落8.2元後跌唔落，昨日已經企穩兼炒番上去，主攻產業鏈下游EPC的興能，今年基本上全年都無炒過，消化一二年下半年的升幅，批完股唔散，要睇喇。

只聞樓梯響不見有人來的房產稅，睇嚟短期要全國大面積下推行機會唔大，意外是睇好的碧桂園（02007）及世茂房地產（00813）比較硬淨外，其他無乜動靜繼續牛牛皮皮。

反而水泥股有留意必要，一來估值仲係平，其次大水泥商今年達成協議，鬥劈價情況不復再，加埋近期華南一帶需求回升，水泥價格有穩步向好趨勢，相信短期會有更多大行調高一四年業績預測，唔使講，揀就一定揀番行業龍頭安徽海螺水泥（00914），近三個月在25至27元之間橫行，只等一個突破的時機。

呢期二三線股繼續獨領風騷，唔信隻CEC國際（00759）可以繼續升，偏偏就繼續升畀你睇，昨收報2.11元，升15.3%，成交仲兩億多元，街貨唔知炒咗幾多轉，相信有番咁上下股仔炒齡的股友，應該知道點看待，古勝亦唔會阻人發達。

此外，近日內地軍工股炒起，見到昨日中航工業國際（00232）及中航科工（02357）異動，前者升12%，收報0.325元，成交2,025萬元；後者升6%，收報3.93元，成交1.28億元。

本地軍工概念欠奉

老實講，呢兩家公司業務頂多同航空產品及相關技術有關，並非專門應用在國防軍工領域，說不上係專業軍工股，都係藉公司名有「中航」兩字炒上，加埋撞啱呢期資金去晒炒股仔，正所謂「時勢做英雄」﹗到底呢類即興炒作炒風有幾長，大家心理有數，故落場追貨宜注意風險。以中航科工為例，股價自七月高位4.4元水平反覆回落至近期低位3.5元水平才喘穩，若短線反彈未能重上4元樓上，有貨宜趁反彈沽出，候再試3.5元水平承接再作考慮。

古勝