香港咖啡文化愈見盛行，大大小小嘅咖啡店亦遍地開花、琳瑯滿目，尋日絲絲就同本身係「賓卡」，喺二○一一年轉型做咖啡店老闆嘅徐奕基（Raymond）傾過計，上市嘅大計雖然仍然在醞釀中，不過佢囝囝就可能率先成為一名咖啡「拉花」高手。
徐奕基原本喺海通國際機構客戶部做董事總經理，一一年與意大利籍老友Domenic Spadaccini夾份創立咗Holly Brown呢個咖啡店品牌。佢尋日就同絲絲講，做咗一、兩年，熟咗門路之後，Holly Brown今年開始會「有錢賺」。
絲絲立即問佢幾時上市，佢就笑笑口話「未有咁快」，話起碼都要有廿間舖先有得諗，相信可能仲要幾年時間。
不過，從Raymond嘅言談中，都感受到佢對Holly Brown嘅全情投入，甚至乎影響埋佢囝囝都對咖啡產生咗濃厚興趣，成日要同Holly Brown圓方店嘅澳洲兩屆咖啡師冠軍及世界「拉花」冠軍Scottie Callaghan學「拉花」。
絲絲覺得，Holly Brown嘅上市大計可能仲要等一等；但Raymond個囝囝，可能好快就成為咖啡「拉花」高手。