絲絲講場：女強人揭百度強得有理
財富雜誌舉辦嘅亞洲最具影響女性論壇，多名大家熟悉嘅事業女強人有份攞獎，包括「女股神」劉央、金融發展局主席查史美倫、百度首席財務官李昕晢等都有到場演講，個個都分量十足，喺自己嘅行業具有相當地位，好似百度李昕晢咁，就分享咗公司點樣透過一連串活動培訓人才！
揼本培育新人獎勵創意
「光棍節」呢一役，嚇傻好多外國人，見識內地互聯網嘅瘋狂，要競爭就要有人才，李昕晢就話，為咗提升內部嘅創新思維，公司特地成立咗一個機制刺激員工度橋，包括舉辦寫程式比賽，每個星期所有工程師都會聚埋一齊，分組寫code互相比拼，而CEO李彥宏亦會在場指導佢哋，勝出嘅組別仲會特別舉行慶祝活動，而有關嘅程式亦會放上百度使用。
另外，百度每年暑假仲會頒發100萬美元，獎勵十名以內嘅初級工程師，表揚佢吔創新嘅想法同貢獻﹗
查太勁睇好區內經濟
另一個得獎者，就係查太，絲絲對佢攞到呢個獎，一啲都唔出奇，佢對中港兩地嘅證券監管市場貢獻好大。絲絲問佢經濟點睇，佢就話相信未來二十年亞洲經濟增長將非常強勁，唔止中國，連印尼、印度、日本都會好「牛」﹗