絲絲講場：H股功臣北京聚首「慶生」
今年係H股登陸本港股市廿周年，港交所（00388）由八月起舉辦咗一連串慶祝活動，好似開市敲鑼儀式、中港兩地研討會及講座等，但要數H股慶祝活動嘅高潮，應該都係今個月二十八號，由「股壇教父」兼「H股總設計師」嘅李業廣帶隊到北京，宴請及答謝當年協助H股來港上市嘅眾多功臣。據聞，當日最少都會筳開十席，非常大陣仗。
李業廣月底拉隊答謝
今年八月初喺香港舉行嘅敲鑼慶祝儀式，雖然有不少內地重量級來港出現，好似中證監前主席劉鴻儒、中證監前紀委書記李小雪、中央企業工作委員會原副書記孫樹義等，但整個偉大嘅H股上市工程，牽涉嘅人多得很，功臣簡直數之不盡。
港交所今個月尾拉大隊到北京，目的就係宴請上次好多未能來港出席敲鑼儀式嘅內地功臣。H股靈魂人物李業廣已答應出席，港交所現時仍聯絡緊其他代表人物出席。港交所主席周松崗同行政總裁李小加，當然也是座上客。依家已有唔少人士收到英雄帖，屆時場面肯定非常熱鬧。
朱鎔基倘露面勢轟動
大家成日話，冇李業廣就冇H股，但教父就認為當年時任副總理嘅朱鎔基至係H股來港上市最重要人物。唔知朱鎔基到時會唔會蒲頭？係就令活動生色不少，意義重大了！因為H股的確改寫本港股市歷史，令香港晉身成為世界級金融中心。
余絲韻