自從證監會行政總裁歐達禮於今年五月，榮升國際證監會組織（IOSCO）旗下亞太區委員會（APRC）主席後，證監會喺國際舞台上嘅影響力與日俱增。唔知係咪因為咁，「證監會論壇」將首次喺港舉辦，鐵定明年一月廿四日舉行，屆時本港、區內以致全球嘅監管機構高層、決策者等都雲集香港，討論大家都好關心嘅監管議題。
呢場金融界盛事首次喺香港舉行，當然不可失禮，演講嘉賓「卡士」陣容強勁。多名猛人畀面出席，包括證監會前主席沈聯濤、IOSCO主席 Greg Medcraft等等，屆時證監會新舊主席同場，都夠話題性。
論壇當日分開多個環節，最具睇頭應該係討論市場廉正同投資者保障嘅環節，請咗港交所（00388）監管事務總監及上市科主管戴林瀚、股壇長毛David Webb、新任刑事檢控專員楊家雄等同場發表意見，「打虎英雄」證監會法規執行部董事施衞民就係該環節嘅主持人。
大家都知，Webb一向對港交所批評多多，尤其係爭取阿里巴巴來港上市一事，佢更勁插港交所有嚴重利益衝突，唔知身為港交所上市科最高話事人嘅戴林瀚如何拆招？另一個焦點肯定係刑事檢控專員楊家雄，大家都知佢前任薜偉成喺退休前批評證監會權力過大，集調查及檢控等權力於一身，市場回響甚大，唔知楊家雄與施衞民屆時會有冇火花呢？
另一個討論有關董事局行為嘅環節，亦甚具話題性，亞洲公司治理協會總裁艾哲明、董事學會主席黃天祐同場，佢地喺反對阿里以合夥人方式上市上，站係好前線，唔知證監會企業融資部執董何賢通，會唔會同佢地「同聲同氣」呢？
余絲韻