Market Insight：科網股基金撐場

姑勿論點，技術上昨日恒指一口氣收復10日及50日線的23,056及22,968點，即市更曾突破埋20日線23,083點，儘管唔少看官同古勝一樣，預期經歷兩個月橫行市，港股第四季有機會「向上走，向下走」，大戶揀一邊破位後進入單邊浪，可是，睇番恒指波幅指數，六月底見30.18一年高位後，七月下旬經已重返15至20的低位徘徊（昨收15.77），至少短期內見唔到衍生工具莊家同公眾睇法相同。經過昨日一升，港股後市由搖搖欲墜，似返到原點，重新洗牌繼續上落市格局。

雅士利貨源歸晒邊

蒙牛乳業（02319）八月收購雅士利（01230）進軍嬰兒奶粉，提收購及後揸過界去到89.82%，公眾持股量唔夠，後者被勒令停牌，日前蒙牛終割愛以每股3.5元沽番4.71億股畀厚樸同淡馬錫，持股量落番去76.58%，停牌近三個月的雅士利也得以復牌。老實講，昨日雅士利升17.1%收報4.24元，意想不到係升得咁少。

睇番拉閘以來，國家表示以百億銀彈支持內地乳業，加埋一孩政策局部放寬，乳業股炒到出煙，期間合生元（01112）升47.2%（最多升60.8%），現代牧業（01117）亦升43%，昨日補漲幅度其實好溫和，更重要係厚樸同淡馬錫都唔係短癮炒家，意味雅士利得番一成街貨左右，以市值150億元計即係15億元，昨日扣番上板16.49億元，大約仲有2.5億元易手，即係街貨16.6%，可以估計呢隻股票已乾無可乾。

古勝冇點你

萬里長空

老實講，往績PE去到21.6倍話平唔平，但同合生元、現牧比較，仲算低一截，依家個市只係得貴一貴但有基金捧場的增長股，或者平到暈都無人吼的股份，照睇昨日在4.1元停咗好耐，可以作為短線入市參考，斷估未炒完，跌穿就止蝕。

新股要贏錢唔容易

網股靜咗幾日，昨日終於有番些少反彈，騰訊（00700）及雲遊（00484）分別升2.4%及2%，網龍（00777）一彈就9.9%，估計同今年「凍資王」、超額831倍的博雅互動（00434）今日掛牌有關。睇暗盤成交唔少，升32.5%收報7.09元，同日掛牌的徽商銀行（03698）升1.1%收報3.57元，上周上市的重慶銀行（01963）仲差一格至返到去6元上市價，唔使講今日焦點都集中博雅身上。

近兩星期上市的新股，撇開「全配售」私人派對新銳醫藥（08180），揸到今日，九隻得兩隻有錢贏，分別係普華和順（01358）及中國賽特（00153），升10.3%及7.7%，毅德（01396）無升跌，其餘六隻統統要揩，重慶行、Mega Expo（01360）、先鋒醫藥（01345）、景瑞（01862）、卡賓（02030）及中國匯融（01290）潛水幅度介乎0.1至11%，顯見短炒正是主流。

博雅IPO要入到三十手先穩獲一手，散戶攞唔到就梗，據知基金就算碌晒人情卡，先分得三幾萬股，估計貨源會分得好散，尚幸學雲遊一樣，保薦行留一手並無以上限5.6元定價，只以5.35元定價，可能會吸引到些少有貨底的基金，在二手市場再買，令首日走勢不至於太肉酸。

講開又講，就算博雅開7.09元，市值得52.2億元（雲遊75億元），秤埋都唔及騰訊1%，亦未到有部分基金10億美元市值以上的投資門檻要求，就算基金真係要押注內地網股，本地仲係無乜選擇。

股仔異動短炒為宜

市況反覆，股仔繼續吸引資金炒作，昨日公司名稱有個「核」字的都見異動，其中中核工業二三國際（00611）登主板升幅榜榜首，升42%、中廣核礦業（01164）升12%、中核國際（02302）升4%。但睇落似乎呢三隻股炒起同核電業冇大關係，一來聽唔到行業有甚麼重大利好消息，二來見兩隻大型核電設備股東方電氣（01072）同哈爾濱電氣（01133）只係分別微升2%及0.8%，所以跟炒的都係以異動股仔看待小注怡情好了！

古勝