絲絲講場：安踏有齊乒乓「金童玉女」
一向以「代表中國、代表體育」為宗旨的安踏體育（02020）尋日宣布，已經簽咗現役奧運乒乓冠軍張繼科、世界乒乓冠軍劉詩雯做代言人，傳承安踏體育一直支持中國乒乓球壇嘅傳統。
張繼科劉詩雯代言
絲絲聽講，張繼科同劉詩雯年紀小小已經係冠軍級球手，佢哋兩個同時係中國新一代乒乓球壇嘅金童玉女！張繼科喺十年前已經入選國家隊，舊年仲喺倫敦奧運會贏得男單、男子團體冠軍，係繼乒乓好手劉國梁、孔令輝之後，第三位同時獲得世錦賽、世界盃同奧運會「三料」冠軍嘅選手。
而有「小鄧亞萍」之稱嘅劉詩雯戰績同樣彪炳，佢喺○九年世界盃時候表現一鳴驚人，當年只有十八歲嘅佢，就成為世界盃史上最年輕嘅冠軍得主，依家已經係有七個世界冠軍名銜嘅乒乓女王添。
絲絲相信，張繼科同劉詩雯呢對金童玉女，一定可贏得更多乒乓世界冠軍o架！
余絲韻