家庭客想平買東涌三房戶，不妨揀東涌最大私人屋苑映灣園，入伙2至11年，五期住宅合共逾5,200戶，最吸引之處在於供應東涌最細的純三房戶，一律望山景，建築面積800餘方呎，入場費夠親民，加上屋苑會所規模全港至大，一家大細都啱玩。不過，屋苑位置吊腳，住戶要駁程邨巴才達港鐵東涌站。
中原鍾慧儀稱，映灣園盤源充裕，減價較其他東涌屋苑進取，帶動上月買賣多達15宗，佔東涌四大屋苑總成交量的近半，現時三房戶放盤最有價講，如入門單位的11座低層D室，建築/實用面積884/645方呎，業主趁租約將完沽貨，上月才叫520萬元，現減至500萬元，平通東涌三房戶，建築呎價5,600餘元，較今年高位回落7%。
美聯李錦榮表示，大三房首選換樓業主持有的9座中層G室，建築/實用面積1,025/756方呎，七月叫價直指650萬元今年高位價，之後連減四口價至現時580萬元，四個月跌價一成。