新盤混戰愈演愈烈，二手樓市可謂無運行，如果想趁市況低迷執平貨，不妨放眼東涌的私人屋苑，區內業主面對優惠「多籮籮」的新盤競爭，加上同區新盤隨時殺埋身，大都有價講，尤其係收開租的業主最肯減價。只要細心揀「宅」，無論係一至三房戶，都不難搵到心水平價盤，搬入東涌做業主。
東涌是本港新市鎮，鄰近赤鱲角機場，不但有港鐵支線，搭車出機場更唔使十分鐘，對經常「飛來飛去」的人士來說，可謂方便至極。講到社區配套，東涌亦不比其他新市鎮「輸蝕」，區內大型商場、旅遊景點、學校等配套一應俱全，就連多年為人詬病的醫療問題，亦隨着北大嶼山醫院的啟用而解決。
最重要係政府將重點發展東涌，未來擬擴展成可容納22萬人口的大型市鎮，配合港珠澳大橋的興建所帶來的契機，區內住屋需求將有增無減，潛力無限。
區內代理表示，東涌私人屋苑的租客層面廣，除了機組人員外，近年吸引唔少外籍人士聚居，成為投資客的收租樂園，一些早年低位入市的收租業主，揸貨至今更賺到笑，旺市時這類收租盤根本「唔憂賣」，叫價硬淨。不過，隨着新盤爭相變相減價促銷，令部分收開租的業主感市況逆轉，趁高位掟貨，個別減價態度頗為進取，帶動上月東涌四大私人屋苑交投急升近倍，市況重現生氣。
東涌有四大私人屋苑，各具優點，想衣食住行最便捷，毗鄰港鐵東涌站的東堤灣畔是首選，兩房戶最抵，入門盤貼近今年低位；家庭客想平買三房戶，不妨揀擁大型會所的映灣園，純三房戶500萬元有交易，平絕東涌。至於上月底失守400萬元的藍天海岸一房戶，仍有平價盤選擇，單身族不要錯過。