絲絲講場：胡應湘起好合和二期先退休
近期本港一眾發展商爭住推盤，咁啱由信置（00083）、合和（00054）及市建局合作嘅灣仔囍匯二期，早排就獲批預售樓花。但合和系主席胡應湘（Gordon）就話，推盤呢樣嘢就交畀阿仔胡文新（合和實業董事總經理）同埋信置主席黃志祥攪。
Gordon話，佢依家主力係要搞掂合和二期，等一拎到開工紙，就會全幅武裝，親自落去地盤。Gordon話，佢都好想退休，但合和二期係佢呢三十幾年心血，佢唔止係對自己、仲係要對灣仔負責咁話，依家最想係將佢起好先，其他嘢都唔理喇！
今年都成77歲嘅Gordon，讀土木工程出身，做工程師做咗五十幾年，據Gordon介紹，合和二期主要會起酒店呢類嘅收租物業，睇準日後大陸遊客會愈來愈多，佢希望日後可以整靚啲吸引到更多遊客去嗰邊，包括擴闊啲路、將啲爛地變成公園等等，所有其他嘢都係等起好先諗，而合和其他嘅發展，佢就話要睇胡文新喇！
至於之前合和想分拆香港物業上市嘅計劃，Gordon就話，嗰時時機唔好，伯南克當時退市言論攪到個市即跌，至於幾時再開始番個計劃，佢就話等合和二期起好先喎！Gordon話，佢地辛苦時間已經捱過左，而家儲咗好多資金，所以資金上無問題。
克羅地亞營商勝香港
身兼克羅地亞榮譽領事嘅Gordon，昨日就搞咗個歡迎會，歡迎克羅地亞第一副總理Vesna Pusic來港，邀請咗唔少商會代表及其他國家駐港領事出席。Gordon話，克羅地亞經營環境都好過香港，香港依家太多爭拗，香港最好嘅地方係自由，但居住卻是亞洲最差，目前政府最重要係要增加土地供應，建議多用儲備去幫助低收入階層。