絲絲講場：戴蒙叫下屬 上網咪亂噏
自從○八年金融海嘯爆發後，美國大銀行一直被監管機構不斷抽秤，當中被人罰得最甘嘅都可算係摩根大通，涉嫌不同事故嘅違規罰款一單接一單，相信CEO戴蒙已經好頭痕。
電郵短訊「有手尾跟」
絲絲聽講監管機構最近幾個月仲開始監控交易員嘅電子通訊內容，搞到銀行界人心惶惶，有見形勢對摩通不利，戴蒙都可謂有先見之明，於是乎，聽聞佢親自落咗道口諭，溫馨提示員工唔好喺電郵同短訊上亂噏廿四。
外界傳聞美國監管機構為咗調查銀行操控利率同外匯市場嘅案件，對交易員嘅即時通訊軟件、電郵、電話等展開監控，仲特別針對交易員圍內嘅即時通訊群組，從中搜集佢哋嘅犯案證據。
戴蒙上星期喺倫敦開會時，就開到聲叫員工要提高警覺，喺電郵同短訊上切記慎言，千祈唔好亂噏廿四，講嘢就唔好作大，公司要保持一個更高嘅標準喎。戴蒙仲強調自己係好認真添，咁即係暗示摩通嘅員工最好醒醒定定，唔好亂講嘢被人捉到痛腳，最後連累公司喇。
余絲韻