Market Insight：市底偏弱提高警覺

恒指兩萬三關口及50日線22,920點雙雙失守，上升及下跌股份數目432及840隻，整體大市點數跌幅雖然唔算大，但升跌股份比例1：1.94顯示市況都幾弱吓。賓架線消息，話近兩日A股成交縮晒，但見唔少QFII基金仲係浸浸落，撳住沽，消息話外資行收風話對周六揭幕的三中全會，不能抱有任何期望，尤其經濟提振措施諗都唔使諗。

早兩日總理李克強打晒開口牌，話市場資金已經夠多，足足係GDP兩倍，再泵水只會刺激通脹，外資行似打定輸數。昨日見到份報告估一四年貨幣供應增長及人民幣新增貸款增長目標，會由一二年的13%及14%，雙雙向下修訂到12%，加埋近兩日外圍強勢，港股獨弱，綜合種種迹象，三中全會無料到唔似空穴來風。

古勝冇點你2013/11/08

萬里長空

強勢股成沽貨對象

社交網站Twitter（上市代碼「TWTR」）發售價上調至26美元，比之前公布17至20美元的目標範圍調高30至53%，集資額18.2億美元是去年facebook之後，全球最大網股IPO。

咪話外國人唔信邪，去年facebook上市大混亂，最後仲要潛埋水，今次Twitter棄facebook所揀的納斯達克市場，揀選紐交所上市，看官今朝睇新聞時大致清楚Twitter嘅賽果。但隔晚於美國上市嘅內地網股好似新浪同百度，有回軟迹象，昨日騰訊（00700）同雲遊控股（00484）亦然，暫時唔敢講話內地網股熱已經玩完，但基金經理揀一堆帳面累積升咗唔少的outperformer開刀，卻十分明顯。

近排濠賭股陰陰跌，昨日連乳業股開始受地心吸力影響，蒙牛乳業（02319）高位累積跌一成六，就算個市唔係無嘢炒，例如前日大升的CEC國際（00759），「一日半內」最多升到六成，但睇番大戶收貨收足半年，一開車好似火箭升空咁，根本無手影可捉，就算明知阿信屋今年銷售已經提早達標，但礙於諗唔通呢個零售業奇葩，點樣把營業額變成盈利，尤其超低息底下，以往超市零售商以貨物「數期」去錢搵錢的絕招都無埋，惟有眼白白走雞。

港交所（00388）剛公布季績，首九個月賺35.28億元，按年升9.5%，單第三季則賺12億元升19.5%，勝大行預期，首三季及第三季每股盈利為3.07及1.04元。綜合街外大行預測全年賺46.7億元，目前完成度75.5%。

港交所現價唔算平

第三季業績勝預期，主要受投資收入按季大升1.8倍，至1.61億元所致。期內股市反彈，加上聯儲局話退又唔退，利好手上債券帳面值回升。不過，現價估值唔平，追唔追見仁見智，一來近日大市挑戰23,500點唔成，基金又再陷買賣兩閒局面，成交縮水風險增加；再者，第四季投資收入估計最叻都係維持第三季水平，或者等LME的交易費上調可以刺激業績，但講緊要到一五年先至反映出來。

君可見，周三中午成績表曝光，港交所股價威半日，昨日又打回原形，九月中132元可能見咗短期高位，捧場客不妨等等，過往經驗係股市氣氛差，25倍PE都有機會見一見，以一四年每股預測賺4.53元，即係大約113元左右。

聯想有力跑贏大市

藍籌股中，昨日表現最堅挺的是聯想集團（00992），事緣公司宣布，截至九月底止季度淨利潤同比上升36%至2.2億美元，表現勝於市場預期，股價收報8.6元，升2%。聯想是眾多個人電腦生產商之中，成功同時進軍智能手機及平板電腦市場的業者，這足以為其估值添上溢價。券商對其盈利前景展望正面，相信股價表現可繼續強於大市。是次升浪股價目標反覆向9元關推進，支持位可參考50日線8.05元。

古勝