如果大家唔太善忘，應該仲記得港交所（00388） 曾大鑼大鼓力谷嘅「納指七雄」，即係七隻納斯達克「巨無霸」公司，透過試驗計劃登陸港交所買賣！不過，隨住戴爾（Dell Inc）由納斯達克除牌，本港嘅「納指七雄」將變成絕響，得番「納指六雄」！
戴爾股份已喺今個禮拜二（十月二十九日）收市後喺美國納斯達克停止買賣，並計劃從納斯達克除牌。因此，喺港交所買賣而非上市嘅戴爾（04331），亦已於本周三（十月三十日）喺港交所停牌。
「納指七雄」喺○○年五月由港交所推出，「七雄」除咗戴爾外，仲有港人耳熟能詳嘅超級品牌，好似微軟、思科同英特爾等。不過，呢個計劃一開始已經係「雷聲大雨點小」，成交少得可憐，平均每日成交額得幾千蚊，唔少日子成交仲「食光蛋」。
所以呢個「納指七雄」計劃，到依家仲有冇存在，真係考起好多人o架！港交所稍後將向市場參與者公布，包括現金分派同從試驗計劃移除戴爾嘅詳情。
另外，自從收緊保薦人新規定喺十月一日實施後，新股申請數字即刻有所反映！港交所尋日公布截至十月底新股申請報告，唔計轉板、反收購、投資工具等上市申請，十月份上市申請有12宗，而九月份有19宗。可能投行真係要睇定啲至交上市申請！
余詩韻