俗語有云，經一事，長一智。保險中介人高度關注保監局獨立嘅討論，幾乎將成份諮詢文件由頭睇到落尾，再由尾睇返轉頭，仲搵埋立法會議員密斟，就係唔想好似上次積金局修例加強中介人監管咁中晒伏囉！
上一次積金局喺強積金半自由行前修例，加強對中介人嘅監管，「好順利」就通過咗法例。金占士收到風，原來唔係中介人唔出聲，只係當時議員要應付「拉布」，忙到甩轆，喺Bargain過程中，幫唔到口。結果，依家保險中介人做份強積金生意都膽顫心驚，驚有咩差錯就被釘牌。
依家保監局獨立，又話要加強監管，自然挑起保險業界嘅敏感神經。佢哋唔止反轉份諮詢文件嚟睇，不停向保監處反映意見，見草案塵埃落定，就再搵立法會議員，甚至搵政府官員密密斟。
金占士聽講，喺業界極力爭取下，違規刑罰方面就會訂明得比較清楚，唔會只係寫「1,000萬元罰款上限」一味喺度嚇人！
其實保險業界願意接受監管，只係希望有份參與保監局嘅董事會同紀律委員。金占士都明白嘅，完全由外行人管內行人真係好無癮！另一邊廂，政府專為獨立保監局成立嘅工作小組喺上星期開咗一次會，主要係傾吓啲過渡問題！
余詩韻