對九十後嚟講，最頭痛係揀科同揀工，如果冇乜idea，不妨聽吓新鮮出爐諾貝爾經濟學獎得主之一、耶魯大學金融學教授席勒（Robert Shiller）嘅意見，或者會畀到個方向你，佢打咗個比喻，話畢業生應該應徵高盛，而唔係Google！
佢唔係特別憎Google，只係將華爾街同硅谷比較。話說席勒早前去咗一個論壇，講到呢個議題。席勒認為，人類所有活動都同金融好有關係，而讀金融嘅人，就正正係學緊點樣去可以大規模、可持續地實現事情，呢一點比起去Google打工，寫吓啲有噱頭嘅程式更加有意思。
雖則佢係諾貝爾經濟學獎得主，但唔係樣樣意見都係金科玉律嘅，佢呢個講法，即刻畀同場嘅另一位學者，Singularity University創新及研究副校長Vivek Wadhwa反駁，佢就幫Google講好說話，話Google投入好多資源去科研發展同創新科技，好似研發自動駕駛汽車咁，唔係寫吓程序咁簡單。
佢仲反問席勒會唔會畀自己仔女投身金融業，製造更多泡沫先？席勒就笑笑口反擊話，佢鼓勵學生去高盛，但唔係同啲一心想賺錢嘅學生講嘅。佢仲強調如果去高盛，一定要高度重視道德，同對金融有興趣。
余詩韻