鴻海前兩日用唔夠100億新台幣嘅代價，投得台灣兩個4G頻段，以新人姿態殺入通訊市場。身為大老闆嘅郭台銘收到消息勁開心，話自己嘅目標係「打造全球國際性嘅電訊公司」。
為咗同中華電信、台灣大哥大呢班老牌業者搶客，佢更加一早部署定，兩年後4G開台嗰時，語音通話同文字短訊全部都唔會收錢。
郭董唔單止係各大富豪榜常客，喺《福布斯》最近公布嘅最具權勢人物排行榜上，佢都排喺第48位，係唯一上榜嘅台灣人，而且排名仲要高過日本首相安倍晉三，認真威水。今次講到進軍電訊業，郭董強調「係玩真嘅」，喺攞到4G市場入場券後，鴻海喺高雄軟體園會請多五百至一千個開發技術人員，新定位係做全球數據中心同雲端應用開發基地，配合4G網絡應用。
講到未來嘅4G發展，郭台銘話，以後移動通訊會係以圖形同影像為主嘅時代，語音通話同文字簡訊只會佔頻寬好少嘅部分，所以將來開台，呢部分業務「統統唔使錢」。郭董咁豪氣，絲絲都戥台灣消費者開心，唔知香港電訊商又會唔會倣效呢個做法呢？
余詩韻