內地科網界猛人輩出，個性獨特，嗜好廣泛，若要絲絲評選，最過癮莫過於騰訊主席馬化騰、京東CEO劉強東、百度創辦人李彥宏，同埋土豆創始人王微嘅「癖好」。
騰訊主席馬化騰鍾情天文，辦公枱布滿天文雜誌，擁有嘅望遠鏡度數驚人，又會搵同事傾天文經。佢出身富裕之家，依家個人身家都係天文數字，買幾多望遠鏡都得啦。
劉強東最享受挑戰人類極限嘅感覺，自○八年起，每年都放20日假，專去啲山旮旯地方，冇手機，冇電郵，以證明京東無論冇咗邊個，都可正常運作。
至於百度嘅李彥宏，生活樸素，唔煙唔酒唔去蒲，最大愛好係侍弄花草，前年去西藏，竟對一路所見植物嘅名字、綱目同特性如數家珍，同行嘅人都話服咗佢囉。
王微個性係動靜皆宜，鍾意登山更愛讀詩，創作嘅網絡劇本《烏托邦辦公室》同《大院》，廣受好評。
其他IT界大佬，好似搜狐CEO張朝陽，就最鍾意爬山，戰勝過5,355米嘅四川四姑娘山，挑戰過珠穆朗瑪峰，紀錄係海拔6,666米。奇虎360董事長周鴻禕係一位野戰玩家，佢喺北京懷柔區打造咗個高水平訓練營。
金山軟件前董事長求伯君（現退居非執董）係中國第一代程序員，對道家無為思想有濃厚嘅興趣，甚至拜在武當張三豐派門下，耍起太極都似模似樣o架。至於巨人集團創辦人史玉柱，就出晒名鍾意到全世界各地冒險。
余詩韻