互聯網金融成為潮流，掌控得好就係金蛋，百度嘅首項理財產品「百發」，亦都喺尋日開始發售，但就唔係「百發百中」，第一日開波就唔「老黎」，網站癱瘓。
「百發」係百度同華夏基金合作推出嘅產品，最低投資額只係1元人民幣，而且仲係限量發售，更聲稱年化收益率可以高達8%。
尋日朝早大約十點半正式開售時，大批用戶搶住登入百度理財嘅網站，令到網站流量大增，最後仲癱瘓咗。雖然百度已經盡快搶修，不過網站都要等到下晝一點半先回復正常。
不過，百度仲擺咗另一個「大烏龍」，就係將自己嘅客戶拱手相讓畀對手「支付寶」！有用戶發現，當佢哋嘗試登入百度理財嘅實名認證頁面時，網頁竟然跳到「支付寶」頁面，認真搞笑。有網民揶揄百度幫呢項產品改錯名，因「百發」根本唔係「百中」咁話。
事實上，呢個產品都算多災多難，「百發」曾經喺網站上承諾嘅8%年化收益涉嫌違規，畀中證監問話。
話雖如此，「百發」第一日開售嘅成績依然唔錯，截至尋日下晝已經有超過12萬用戶購買，涉及金額超過10億元人民幣。