中資金融機構呢幾年喺海外愈嚟愈活躍，最近就有中央匯金旗下嘅中國建投喺英國有搞作噃！英國《金融時報》話，中國建投旗下嘅中建投信託，最近派咗23名高層，去英國「深造」兩日，課程嘅負責人仲漏口風，中建投信託可能想收購當地嘅財富管理公司，繼而踏足歐洲市場添！
中建投信託今次派咁多人浩浩蕩蕩去英國，睇怕唔係讀吓書增進知識咁簡單，話唔定公司遲吓喺英國真係有動作跟尾。呢班高層喺倫敦商業金融學院培訓兩日，不過唔好睇小只係短短兩日課程，內容都幾豐富o架，聞說要學吓英國同業點樣競爭，當地嘅法規環境，仲要學吓點樣做收購合併。如果佢哋喺英國有收購，就學以致用喇！
參考基金互認運作
仲有依家講緊中港基金互認，呢個制度正係歐洲始創，作為內地最大財富管理公司之一，中建投信託今次都可以學習吓歐洲國家嘅基金互認係點樣運作。
其實之前中資金融機構喺海外收購已做出一啲成績，好似中信証券收購里昂證券、廣發期貨收購英國NCM期貨公司咁，所以外界對中國建投接力「出海」，都抱有好大期望o架！