孖妹S檔案：星級分析師 練得好唱功

梁永祥：股評中立 唔派「山埃」

高妹： 歌星就話有型有款，估唔到做iBanker都可以咁有星味，我講緊金融界「靚聲歌王」梁永祥呀！佢好勁o架，現任香港演藝學院校董會主席，以前亦做過香港舞蹈團董事局主席，唔通佢除咗唱歌叻，連演戲、跳舞都掂？

　梁： 我知道有傳媒朋友寫我做「歌王」，不過好似無「靚聲」兩個字喎，其實我唱歌係用嚟行走江湖，有時出席啲宴會場合，無啦啦就畀人叫咗上台唱歌表演，咁我梗係袋住兩隻飲歌喇，好似張學友嘅《舊情綿綿》和陳奕迅嘅《單車》。如果我去唱卡拉OK，就一定揀蔡國權嘅《寒傲似冰》，因為好少人會同我爭咪唱！不過，我真係唔識演戲、跳舞，係識彈吓木結他。　

「靚聲王」曾做幕後配唱

高妹：當年你幫過一齣舞蹈劇《笑傲江湖》做幕後配唱，咁專業仲唔係「靚聲王」？你有咩唱歌心得？

梁：音樂係要講少少天分！唱歌要好聽，本身聲底當然要唔錯喇，之後就要搵出自己嘅音域，再訓練吓音準，若有感情再加上技巧，咁就應該唔會差得去邊o架喇。之前我經朋友介紹，都跟過一個唱歌老師上過兩堂，可惜佢好忙，所以我都Book（預約）唔到期。不過，相比起唱歌，我都係口水多啲，我份工作經常需要同人傾偈，會議又多，所以我搵啲錢咬出來係無血無汗，不過就好多口水喇！

高妹： 嘻嘻，你就口水多多，咁大行報告周不時唱好股票又係咪「吹水」居多呢？

梁：我知道不少散戶都有呢個懷疑，甚至係心結，但我喺金融界工作多年，可以老老實實咁講，金融機構有一定道德水平，從事研究嘅人需要接受合規培訓，亦知道底線。反而，散戶買賣股票時，要帶着了解嘅心態去吸收資訊，而非盲目相信大行報告嘅股份推介，因為投資需要理性分析，千萬唔好人買你買，人哋叫你買，你就真係去買，咁樣你咪變咗姓「羊」囉！

出報告並非「舞高弄低」

高妹：聽你講咁，啲大行報告好似幾難出蠱惑喎！

梁：好似新鴻基金融都有定期出投資報告，但研究工作與銷售工作之間會有道防火牆，防止利益衝突。有時候，散戶又見到市場上嘅大行報告一時唱好一時唱淡，以為大行想喺低位買貨，喺高位沽貨，其實係誤會。因為大行亦有信託客戶，當客戶見到大行所出嘅報告不斷唱好或唱淡某隻股票時，佢就會開始湧現個人投資想法，透過銀行買貨或沽貨，但呢個買賣決定未必等於大行立場或投資意見。

高妹：唉！要喺市場上搵份可信嘅大行報告參考吓，原來都係件難事。

梁：我認為生意要做得好，原則就係把客戶利益放於第一位，因為客戶賺咗錢就會再投資，相反輸錢變咗隻蟹，咁公司同客戶咪要一齊坐艇囉？這絕非好事。因此值得信任嘅研究報告、股份推介一定既專業又準確，唔可以畀「山埃」貼士，而新鴻基金融就係利用幫客戶致富呢個營運策略，等客戶主動咁黐住我哋喇。

王昕媛：評估「錢景」 不離盈利

彩兒：究竟誰是金融界「情歌天后」？經我嘅密探回報，原來就是呢位「上海姑娘」，唔知你嘅拿手飲歌係邊隻呢？

　王： 哈哈，我好鍾意唱歌o架，得閒就會和朋友去唱卡拉OK，女歌手就鍾意點唱梁靜茹、范瑋琪嘅歌；男歌手就會點唱張信哲和周杰倫，前者聲音既深情又獨特，後者有不少歌嘅歌詞亦充滿詩意，而且我仲好鍾意一邊唱一邊飆高音呢。

單簧管六級 間中玩吓

彩兒：飆高音？咁你應該真係唱得之人喇！我知道你唱歌好聽，仲識得一種氣質樂器添！

王：小時候我就開始學習單簧管，但我只有Level 6程度，如果要達到演奏級別，仲要再努力。不過，我工作太忙了，基本上好難抽出時間再去考試，但間中都會拎支單簧管出嚟玩吓！

彩兒： 講完唱歌，又講吓大行報告「唱」股呀，佢哋一時唱好，一時唱淡，作為散戶真係好難理解囉！

王：對於Sell side來說，這不是個好做法，因為大家會質疑分析員嘅專業能力；但對於公司來說，因為可以推動市場成交額，有助增加公司佣金收入。不過，我認為關鍵是注意大行報告看法改變嘅時間長短以及理由，如果係中線改變看法，這可能代表一個具有觀點徹底改變嘅投資故事，咁大家就要細心留意。另外，散戶面對呢啲報告，有時真係靠經驗去或者拎市場共識，但對於市場共識嘅判斷亦要基於一個事實，就係市場上有多少分析員睇好呢隻股票，如果超過五人或以上，我就不會考慮呢個市場共識，因為已經無意義了。

彩兒：股評人會唱好股市或股票，咁你點樣先會唱好一隻股票？

王：唱好理由一定係某隻股票出現持續利好或者大趨勢向好嘅情況，舉個例子，現時騰訊（00700）嘅手遊、網遊業務都有高增長潛力，遊戲選擇又多，其微信貨幣化更是估值及盈利增長嘅中長線催化劑，因此我會看好其投資前景。另外，一些具有轉機故事概念嘅板塊，例如體育用品股及太陽能行業股，我都覺得它們股價有轉勢能力。

大行報告 參考勿跟足

彩兒：如果散戶想跟大行報告嘅股份推介去賺快錢，應該點掌握買賣時機？

王：散戶睇大行報告應該係睇觀點，而買賣股票嘅時間點就要自行判斷。如果人人都跟着大行報告嘅股票推介去走，咁照道理市場上應該會無人輸錢，而是人人賺錢，不過市場係理性嘅，所以無可能發生呢個結果。講到最尾，股票買賣嘅執行力在於自己嘅深入分析，而非依賴大行報告！

高妹、彩兒

若有料報畀高妹同彩兒或有嘢問，

可電郵money.biz@opg.com.hk