絲絲講場：福布斯中國首富又係佢
福布斯中國富豪榜尋日揭盅，冠軍寶座一如預期，由近期橫掃多個富豪榜嘅大連萬達集團董事長王健林奪得，反而最大特色，係今年多咗87位新面孔，當中新能源行業億萬富豪李河君，就憑665億元人民幣嘅淨資產，勇奪排名榜第四位。
漢能李河君上榜新貴
中國經濟增長速度今年繼續放緩，但今年榮登中國福布斯富豪榜多達168人，人數創新高紀錄外，排名前100位富豪嘅淨資產總計就已經高達1.92萬億元人民幣。
除咗一向雄霸排名榜嘅房地產、科技同飲食股老闆，包括娃哈哈集團董事長宗慶后、百度董事長李彥宏、騰訊首席執行官馬化騰同埋阿里巴巴創辦人馬雲外，喺今年上榜新貴入面，最矚目嘅應該係漢能控股集團董事長李河君。
漢能控股集團喺九四年成立，依家已經進身為全球最大嘅薄膜太陽能電池板和設備生產商之一。
其實，近年中國城鎮化步伐冇停過，帶動消費品同服務業、製藥同醫療保健、文化娛樂同埋移動互聯網等行業，亦令到呢幾個行業成為中國創富運動中嘅重頭戲添！