高伯遒（William）同幾個老臣子，舊年「前後腳」離開恒隆地產（00101），佢自己就過檔去南華置地（08155），雖然係由藍籌轉去咗創業板打工，不過人工有加無減。自從離開恒隆後，佢足足去咗四次英國，探仔兼且睇波。
佢係利物浦球迷，當年喺利物浦讀書嘅佢話，今時今日嘅球賽，已經同佢當年好唔同，除咗啲人無咁激之外，仲分好多唔同名目嘅收費，商業化咗好多！
過去廿年佢專搞內地業務，去到新公司，緊係想搞好內地發展嘅質量同速度，不過都需要時間去了解更多。
除咗瀋陽之外，依家公司都有積極睇緊重點二、三線城市嘅發展機會。
同William差唔多時間離開舊舖嘅老臣子，已經各有各發展，好似姚子賢咁，就去咗上海發展，既然拍檔咗咁多年，會唔會搵埋一齊再做同事，佢就話睇吓點啦！