呢排新股市場旺爆，日日排住隊招股，半新股好容易畀人遺忘咗，如果個個好似開元產業投資信託（01275）老細咁，咁有個人色彩，好可能幫到投資者記住佢哋喎。已經62歲嘅開元主席陳妙林，係運動發燒友，尋日一身綵衣現身，原來啱啱用咗28日，由長春踩到嚟香港金紫荊廣場。
呢位掌門人三個幾月前，帶領開元成功喺香港上市。佢做生意固然好有毅力，估唔到呢個年紀都咁勁，以頑強意志創下多個壯舉。今次佢連同其餘11名來自開元單車隊嘅單車發燒友，長征五千里路，用咗28日由長春踩到嚟香港。無論係騎程里數或日數，都打破咗○八年北京、○九年台灣環島同川藏，及一一年法國咁多次騎行以來嘅紀錄。
佢係今次單車之旅年紀最大嘅成員，不過陳總平日訓練有素，做開大量運動，朝朝返工前會踩單車去游早水，放工仲跑埋步，兼有連續多年嘅冬泳習慣，所以即使騎行途中遇到颱風菲特，都無礙12位壯士創壯舉。
連新加入公司嘅行政總裁張一鳴都忍唔住開口盛讚陳總，話陳總唔煙唔酒，係佢見過咁多位民企老闆之中最踏實嘅。
陳總今次亦順帶考察咗公司旗下酒店，共入住20間公司酒店，但係講明不得大肆張羅招待，好明顯係微服出巡啦。
余詩韻