Market Insight：電力股贏面較高

由港股在美國的預託證券收市價顯示，今日港股回試23,100點樓下的可能性非常高。不過，今日第三季結，基金粉飾櫥窗的誘因唔細，或者今日大市及個股有無形之手力托。但論到踏入十月初的市況，古勝唔多睇好，今年兩試23,500點不果，加埋內地進入「十‧一」長假期休市，以外圍馬首是瞻，而美國國債上限爭拗同埋十月退市的疑慮未散下，回吐壓力正在增加。

自貿區刺激暫不大

上周五港股升82點報23,207點，國企指數弱勢持續，跌46點報10,494點，過去十二個交易日，陰陽燭圖上僅有一支陽燭出現過，似有大戶正逢高沽貨情況。事實上，上海自貿區掛牌的消息，對A股刺激唔大，聽賓架線口風，仲係唔少人質疑一些操作上的可行性，反而更多基金經理注視踏入第四季前夕，內地經濟數據能否保持着七、八月的強勁勢頭。

古勝冇點你 2013/09/30

萬里長空

上周五，輝山乳業（06863）破底固然失望，最低見過2.41元，比招股價2.67元低一成，認真誇張。今日基金季結，為盤數唔好太難睇，揸咗重貨的，今日做番上水面機會依然存在。

同日，中國3D數碼（08078）狂插41%收報0.024元，原因係一送五紅股正式落入小股東手上，開始交易所致。睇番月初除淨，變相街外流通股份市值大縮水之後，股價由0.026元起步，如入無人之境掃到去0.127元，一如預期，紅股街貨登場隨即跌凸，成日將股份又合又拆的三四線股，唔貼市的散戶仲係少玩為妙。

第三季內地煤價跌幅比市場早前預期大，雖然九月電企上網電價同時有1至2分人民幣跌幅，不過整體而言，煤價回落對電企季績的好處還是較大。踏入第四季，內地天氣轉冷，煤價進入季節性淡季，而聯儲局下調截至明年底的經濟展望，對環球能源價格估計起到進一步冷卻作用。

另外，近日市場再次傳出發改委擬把上網電價下調，市場共識是，若短期內真的下調上網電價，年內電價再減機會相當微。至於明年，考慮電企過去幾年虧損情況所作彌補，電價再減的幅度也不會大於煤價的跌幅，畀到電企休養生息機會。

潤電有望拾級而上

華潤電力（00836）今年受合併華潤燃氣（01193）及華潤系的不利消息影響，估值壓縮的情況最為嚴重。睇番上半年，收入323億元，按年升4.5%，但得燃料費用急降19.2%之助，純利53.3億元，按年增長77.6%。低估值的潤電收購高估值的潤燃失敗，古勝相信對股東比較有利，管理層表示會繼續以發展核電業務為中期的核心，估計今年底前，可控裝機組合達到27,000至28,600MW。

如果明年電價減幅介乎2至4%，估計潤電明年業績會有持平至單位數的增長，綜合大行預測，全年賺107.1億元，市盈率8.1倍，相對過去四年8至14.2倍的估值。潤電股價在六月低見16.36元後，低位已漸見承接，在估值接近近年下限，相信短期向上的機會遠高於繼續探底。

炒概念股見好要收

阿里巴巴即使最終未能登陸港股，亦會轉投美國實現上市計劃。事實上，今年以來美國科技股炒風再現，最近傳聞連熱門手機及facebook遊戲──Candy Crush的開發商亦籌備在美上市。不過，經驗相告呢類企業搞得上市，多半代表業務高峰已告一段落，所以是否值得去追捧呢類新股，值得商榷，反而，在這些新股登場前，藉機炒作相關影子股的做法也許相對值博。

網龍（00777）早前宣布出售最值錢的業務，失去分拆憧憬下股價一度進行整固，但上周五公司就出售91無線業務及派息召開股東會表決之日，股價突現異動，急升7%至20.65元收市，結果顯示建議順利獲得通過，未令捧場客失望。總之，跟風炒作概念股並無不可，最重要係明白風險所在，持投機心態量力而為，見好識收，且須嚴守止蝕紀律，冇得輸打贏要。

古勝