絲絲講場：滙豐預習日用人民幣

呢排成日講港元係咪會被邊緣化，官方就梗係力撐港元啦。滙豐尋日整咗個「環球人民幣日」，畀同事喺工作同生活上有多啲機會同人民幣「打交道」。老友叫絲絲唔好將件事複雜化，個活動同港元邊緣化問題沾不上邊喎！

人民幣日節目真係多籮籮，一早就由幾位美女打開序幕，滙豐員工一返工，就有幾位女同事喺大堂派人民幣朱古力金幣，食過人民幣朱古力，做嘢都特別醒神！嚟到午餐時間，各位「賓卡」去到Canteen都會發覺有嘢唔同咗，唔係午餐又加價，而係餐牌嘅價錢，都係用人民幣列出o架，集團話要畀員工感受吓用人仔埋單嘅感覺喎。

收工都有節目，輕輕鬆鬆去Cocktail，兼有人民幣小遊戲玩添，連滙豐香港區總裁馮婉眉（Anita）同滙豐亞太區副主席兼行政總裁王冬勝（Peter）都落場玩埋一份，與眾同樂。畀員工喺一日努力工作後飲番杯，大笨象又諗得幾周到喎，不如第日舉辦吓美元日、港元日或者英鎊日，咁就每日返工都係樂趣啦！