科技發展愈嚟愈巴閉，唔單止用嚟研發電子產品，仲廣泛應用喺好多日常生活之中，除咗絲絲最常見又最留意嘅美容化妝之外，連飲食都融入更多科技元素，尋日絲絲品嘗到一條好Amazing嘅小黃魚！
主打上海菜嘅小南國（03666），佢哋嘅投資者關係高級總監黃琬儀（Louisa）推薦「小黃魚」呢道菜，絲絲經常食，有乜特別？唔好睇小佢，因為條魚係用咗「低溫快速微凍技術」，由上海運嚟香港。
呢個技術非常架勢，可以將條魚短期保存喺低溫，作「保鮮」之用，兩、三日後解凍，條魚仲可以「翻生」游水！嘩，咁似啲科幻片劇情。
呢個技術係小南國早前投資一間生物科技公司所得，因為公司會喺上海大量採購小黃魚，以減低成本，但係雪藏太耐肉質就會霉，呢項技術令食客食到「新鮮」魚喇。