絲絲啱啱收到一個驚人嘅消息，兩大IT界巨頭Google同蘋果公司準備聯手，不過呢次合作並唔係要研發新嘅智能產品，而係要成立一間名為「Calico」嘅公司，一齊踩入醫療保健界咁話！
Calico其實係「California Life Company」嘅縮寫，呢間公司如其名，主要集中做健康相關工作，好似要挑戰衰老等相關疾病。雖然消息好突然，不過Google都準備充足o架，聽講佢哋已經搵咗蘋果公司嘅董事長萊文森做Calico嘅CEO兼始創投資者。
萊文森唔單只係IT精英，佢仲係知名基因科技公司Genentech嘅前行政總裁暨現任董事長，難怪Google嘅CEO兼始創人佩奇都話，冇人會比佢更加適合帶領Calico啦。
佩奇仲透露，Calico喺醫療保健同生物技術方面有唔少長期計劃，所以好有信心，公司可以改善未來幾百萬人嘅生活添。就連蘋果公司CEO庫克都非常睇好呢間新公司，仲好感嘆咁話生命苦短，期待睇到萊文森嘅成果可以扭轉人類命運。
余絲韻