唔少內地科網公司都「踩過界」踏足金融市場，成功例子就有阿里巴巴集團旗下嘅餘額寶，呢個基金嘅總投資金額據講剛剛突破500億元人民幣，令到唔少公司心郁郁想做埋一份。好似百度李彥宏，自然亦不甘後人，最近就畀人發現佢哋靜靜雞註冊咗一個網站，可能係想借機做埋互聯網金融喎！
有心水清嘅網民發現，百度旗下嘅網上支付公司「百付寶」，最近就註冊咗tongchibao.com呢個網站，雖然暫時唔可以上到呢個網，不過網站嘅IP地址就指向百度，亦有資料顯示網站嘅註冊人就係同百度相關嘅人員。除此之外，網站網址似乎係普通話拼音，譯音可能係「通吃寶」，加上之前又傳出百度想搵基金公司合作，睇嚟百度真係好有心想做金融生意喎。
不過百度都唔會因此忽略自己本行嘅，最近又再一次證明自己先係內地科網公司嘅「一哥」喇。事緣芬蘭手機遊戲公司Rovio要推出大熱遊戲Angry Bird嘅新game續集《星球大戰2》，但Rovio覺得百度旗下嘅91平台喺國內擁有明顯嘅用戶優勢，所以就畀91平台嘅用戶可以獨家早一日，喺尋日搶先下載遊戲先玩為快，而Rovio先至再向全球開放，畀全球game迷下載。
計絲絲話，百度已經喺互聯網界做到咁好成績，如果連金融生意都做埋，咁就真係「通吃」喇！