講起韓國嘅代表食物，除咗泡菜之外，相信非炸雞莫屬。韓國嘅炸雞店開到通街都係。不過舖頭開得多唔代表生意好，原來南韓有唔少家庭為咗開炸雞店，都將自己層樓抵押畀銀行借錢，但因為生意麻麻而無力償還債務，仲可能會拖累南韓經濟添﹗
根據一個南韓財團嘅統計，南韓炸雞店數目喺過去十年增加三倍，每年都有七千多間新店開業，但每年就有五千間炸雞店倒閉。開得咁多皆因當地大企業嘅員工喺五十歲左右就要被迫退休，但退休金又支持唔到生活，惟有焗住做呢啲小生意維持生計啦。但最恐怖係，原來接近一半捱唔過三年，八成則會於十年內結業。
由於店舖嘅開業資金都係靠銀行貸款，大量炸雞店令到呢啲家庭嘅負債比率屢創新高，舊年嘅家庭負債比率就佔可支配收入高達136%。自從炸雞市場飽和後，貸款嘅壞帳率愈來愈高，除咗令到家庭嘅消費下降，銀行亦不願借貸，令到市場資金缺乏流動性，長遠會影響南韓嘅經濟。
「炸雞店泡沫」睇落都幾恐怖，唔怪得南韓政府要出手啦，佢地已經投放咗13億美元，資助超過15萬名低收入借貸人士，透過延長佢哋嘅還款期，或者撤消最多一半債務，等個經濟傷害減到最低。
余詩韻