絲絲講場：女車神愛上海龜意志
恒生銀行（00011）呢個月初，至請咗世界級攀山專家曾志成向員工分享挑戰極限嘅心得，尋日又再搵「牛下女車神」李慧詩嚟講talk，個名同佢差一個字嘅恒生銀行行政總裁李慧敏（Rose）都係座上客。唔講唔知，原來女車神很喜歡海龜。
李慧詩自言喜歡海龜，因為海龜出生後，喺大海中嘅求生意志，勉勵佢要堅持奮鬥，自強不息，唔怪之得Rose送畀佢嘅紀念品，就係同海龜有關。說來奇妙，李慧詩嘅單車運動講求速度，偏偏佢就鍾意動作緩慢嘅海龜。
恒生講talk遇強愈強
女車神講talk內容，圍繞「遇強愈強」嘅心得，除咗Rose咁捧場之外，原來有近300位恒生員工參加。出席恒生高層包括財務總監梁永樂、傳訊及企業可持續發展總監張樹槐、分行網絡業務主管譚麗琼及商業銀行業務總監彭漢雄。
恒生同事十分欣賞李慧詩永不言敗嘅精神，講座後踴躍排隊同佢合照及請她簽名留念，簽名環節更長達45分鐘。
余詩韻