港交所（00388）力推董事多元化，鼓勵更多女性加入董事局，不過，股壇長毛David Webb做嘅調查就顯示，本港上市公司女性董事平均數目只有0.93個，即係平均一個都唔夠。有622間公司（約39.6%）一個女性董事都冇，598間（38%）就只有一個咁大把。睇嚟，香港要推行女性加入董事局，真係要加把勁！
Webb剛利用今個暑假小休，完成整理本港所有上市公司由九○年一月至依家嘅數據庫，包括董事局如何組成等。佢尋日就率先披露，女性董事佔香港上市公司嘅數目同比例。
雖然香港公司女性董事平均數仍然唔夠一個，但比例已較23年前好咗。本港上市公司數目23年來翻幾倍，由九○年一月初只有292間，增加到今年九月嘅1,572間，女性董事嘅平均數目由0.43個，增加到0.93個。
喺九○年嗰陣，69%上市公司一個女董事都冇，就算有，好多時都只係主席個老婆。但到今年九月，只有39.6%上市公司一個女性董事都冇。有兩個或以上女董事嘅公司，九○年只有11%，到依家已經有22%。
Webb仲提到，港交所今年一月初，規定董事局最少要有三分一係獨立非執董，以前要求係最少三名。所謂「上有政策，下有對策」，佢發現好多公司惟有將董事數目由10個降至9個，以規避唔使增加委任新獨立非執董。
舊年一月，有144間公司嘅董事局有10個人，到今年九月，減至只有82間。相反，喺舊年一月嗰陣，有261間公司有9個董事，但到今年九月，就增至326間。
余詩韻