內地銀行嘅暴利年代，激發唔少嘅批評，由平民、學者、以至退休銀行家，都不忿銀行榨取小存戶血汗錢。
呢方面嘅批評，仲畀清華大學教授李稻葵搬到上達沃斯世界經濟論壇，佢大聲疾呼話金融業好對唔住一般老百姓呀！各位內銀老總，唔知你哋會唔會聽到大家嘅呼喚呢？
李教授認為，金融為實體經濟服務之前，首先就應該為老百姓服務。內地人民依家嘅儲蓄率有50%，而家庭儲蓄率就有30%以上，咁多錢一係去咗銀行，一係就去咗股市，但絕大部分時間，銀行嘅名義利率都低過通脹，擺明輸錢。
但係金融業咁多年嚟都係壟斷行業，一邊喺老百姓手上平價獲得資金，另一邊就透過放貸賺取超高利潤，簡直係過去三十幾年金融業嘅悲劇呀！存錢等於輸錢，老百姓於是將啲錢擺喺股市，A股近日就話好景啲，弊在過去十幾年，輸身家嘅小股民真係不計其數呢！
學李稻葵話齋，除非有內部消息，唔係嘅話，今時今日仲有邊個會想將啲錢倒落股市？李教授講到連青筋都現埋，就知道啲老百姓有幾慘情啦。
余詩韻